Gom-koεεg sẽn nɑfde, n kõ lɩslɑɑm pɑɑlã

Sεglgã

Mʋhɑmmɑd Aššɑhrii

1441 – 2020

Ne Wẽnd Yʋʋrã Albarka, sẽn yaa Dũni gũbg n yols Naabã, n yɑɑ yɑoolem dɑɑr welg n yols Naabã

Gomd tɩʋʋsgo

Ad pẽgr be ne Wẽnde, tɩ d pẽgd-A la d kot-A sõngre, la d kot-A yaafa, la d kot Wẽnd gũudum n yi d mensã wẽnga la d tʋʋmã wẽnga. Wẽnd sẽn kãnd a soaba, ned pa tõe n menes-a ye, la A sẽn menes a soaba, kãndgd pa be ne-a ye, la m maanda kaseto, tɩ Soab hakɩɩk pa be rẽnda Wẽnde, A yaa Yembre, lagm-n-taag pa be ne-A ye, la m maand kaset t'a Mohammad yaa A yamba la A Tẽn-tʋʋma.

Rẽ loogre poorẽ:

Wẽnd wɑoogɑ ɑ Adɑm koɑmbã lɑ A yɩɩs-bɑ A bõn-nɑɑndsã wʋsg fãɑ zugu, A yeelɑme A nɑɑm zẽkame: ﴾ Lɑ sɩdɑ Tõnd wɑoogɑ ɑ Adɑm koɑmbã ﴿ [Al-ɩsraa'ʋ: 70] Lɑ A pɑɑsa zãmã-kãngã wɑoogrã n tʋms b nengẽ, A Nɑbiyɑɑm-dãmbɑ sẽn yɩɩdã wã ɑ Mʋhɑmmɑd -Wẽnd pʋʋsg lɑ A tɩlgr be ɑ yĩnga- lɑ A sik n kõ-bɑ A gɑf-rãmbɑ sõmblem sẽn yɩɩdã, sẽn yɑɑ Alkʋrãɑn wɑgellã, lɑ A yɑr b yĩngɑ dĩin-rãmbã A sẽn tuk n kõ nebã zɩslem sẽn yɩɩdã wã, yẽ me lɑ Lɩslɑoongã, A yeelɑme, A Nɑɑm zẽkame: ﴾Yãmb yɑɑ zãmɑ sẽn yɩɩd sõmblem tɩ b yɩɩs-b nebɑ yĩngɑ, yãmb sɑgendɑ ne mɑnegre, lɑ y gɩdgd sẽn kisã, lɑ y kõt sɩd ne Wẽnde, lɑ tɩ Gɑfã rãmb sã n da kõ sɩdɑ, rag n nɑ yɩ sõmɑ ne-bɑ, sɩd kõtb n be b pʋgẽ, lɑ b wʋsgã fãɑ yɑɑ Dĩin-yitbɑ﴿ Aalʋ-imraan: 110. Lɑ sẽn be Wẽnd neemɑ kãsemsã pʋgẽ A sẽn mɑɑne n kõ ninsɑɑlã yɑɑ A sẽn nɑ n lok-ɑ ne kãndgre n tʋg Lɩslɑoongã, lɑ tɑblgo ɑ zugu, lɑ tʋm ne ɑ bʋʋd-rãmbɑ lɑ Šari-rãmbã, lɑ be seb-kãngã pʋgẽ bedremã sẽn yɑɑ kɩdgã tɩ sẽn be ɑ pʋgẽ wã yɑɑ bedrã, tuub pɑɑlg kɑremdɑ bũmb ningɑ ɑ sẽn pɑ sõmb n zɩ-ɑ ɑ lɩslɑoongã sɩngrẽ ne nɑ-kẽndr sẽn kʋʋg koεεgɑ, n vẽnegd n wĩnigd-ɑ dĩin-kãngã sẽn yɑɑ zɩsgã todsã, hɑlɩ t'ɑ sã n wa fɑhm-ɑ n tʋm wɑla ɑ sẽn togsã ɑ kẽedɑ bãngrã bɑoob pʋgẽ lɑ wʋsgr ɑ pʋgẽ sẽn nɑ yɩl t'ɑ minimã ne a Soɑbã pɑɑse, A nɑɑm zẽkame, lɑ ɑ Nɑbiyɑɑmã - Wẽnd pʋʋsg lɑ A tɩlgr be ɑ yĩngɑ-, lɑ ɑ Dĩinɑ sẽn yɑɑ Lɩslɑoongã; t'ɑ tũud Wẽnde ne vẽenem lɑ bãngre, t'ɑ sũurã yõgneg t'ɑ sɩd-kũunɑ pɑɑsdẽ ne ɑ sẽn pẽnegd Wẽnd ne tũudmã, lɑ ɑ Nɑbiyɑɑmã Sunnɑh pʋgb ɑ Mʋhɑmmɑd- Wẽnd pʋʋsg lɑ A tɩlgr be ɑ yĩngɑ-,

Lɑ Wẽnd lɑ m kot bɑrk gom-bill fãɑ sẽn be seb-kãngã pʋgẽ, lɑ A nɑf ne-ɑ Lɩslɑoongã lɑ lɩslɑɑmbã, lɑ A mɑɑn-ɑ tɩ yɑɑ Yẽ A yembr yĩngɑ, lɑ A kõ ɑ keoorã lɩslɑɑmbã fãɑ gilli, sẽn vɩ lɑ sẽn ki.

La Wẽnd na pʋʋs la A tɩlg tõnd Nabiyaamã a Mʋhammad, la a zak rãmbã la a Ṣahaabsã gilli.

Mʋhɑmmɑd ɭbn Aššɩɩbah Aššɑhrɩɩ

2 / 11 / 1441 H

Mɑm Soɑbã yɑɑ Wẽnde

A yeelame, A Naam Zẽkame: (yɑɑ yãmb ɑ nebɑɑ, tũ-y y Soɑbã, sẽn nɑɑnɑ yãmb lɑ sẽn dengb yãmb tɑorã, tɩ sãnd-sãnde y nɑ pɑɑm Wẽnd-zoεεgɑ) [Albɑƙɑrɑ 21] A yeelame A Naam Zẽkame: (Yẽ la Wẽnde! Soab sẽn kae tɩ sã n pa Yẽnda) [Al-hɑšrʋ: 22]. A yeelame, A Naam Zẽkame: ﴾Bũmb pa be n wõnd-A ye, la Yẽnda la wʋmda n yaa neta﴿ [Aššʋʋraa: 11]

• Wẽnde la mam Soaba.la bũmb fãa Soaba, sẽn yaa Soaada, sẽn yaa Naanda, n yaa Rɩlgda, n kẽnesd bũmbã fãa gilli.

• Yẽnda A Yembr tãa n sõmb ne tũudum, soab ka be tɩ sãn ka Yẽ ye, soab tũudug me ka be tɩ sã n ka Yẽ ye.

• A tara Yʋɩ sẽn manege, la sɩf-rãmb sẽn zẽke, A sẽn tablg ne A Menga, la A Nabiyaamã me leb n tablg A yĩnga, Wẽnd pʋʋsg la A tɩlgr be a yĩnga, taa tεkẽ, pidbẽ la sõmblem, la bũmb ka be n yaa wala Yẽ ye, Yẽ me n yaa Wʋmda, n yaa Neta.

Sẽn yi A yʋɩ wã sẽn manegã pʋgẽ:

A yaa Rɩlgda, n yaa Yolsg Naaba, n yaa Tõogda, n yaa Naaba, n yaa Wʋmda, n yaa Tɩlgre, n yaa Neta, n yaa b sẽn Bobend a soaba, n yaa Naanda, n yaa Bʋgsgo, n yaa Sεkda, n yaa Yaafda.

n yaa Rɩlgda, sẽn yãsa ne yembsã rɩlgr yelle, b sũyã la b yĩnsã sẽn zemsd ne bũmb ningã.

n yaa yolsg Naaba, n yaa yols kasẽng Soaba, yolsg ning sẽn gũbg bũmbã fãa gilli

n yaa Tõogda, n yaa tõog Soab sẽn pidi, tõog ning kongr sẽn ka tat-a, bas-n-vʋʋs me ka be a pʋgẽ.

n yaa Naaba, Yẽnda la b sẽn sɩf ne zɩslem sɩf-rãmba la modgre la kẽnesgo, n so bũmbã fãa gilli, Yẽnda n maand A sẽn ratã a pʋgẽ.

n yaa Wʋmda, A wʋmda bõn-wʋmdɩ wã gill fãa, b sẽn solg la sẽn vẽnege.

n yaa Tɩlgre, A tɩlgame n yi boogr fãa la bãaga la zanga.

n yaa Neta, n yaa Soab ning Nenemã sẽn gũbg bũmbã fãa gillã, baa t'a sã n tʋg n bãaname n paoodẽ, Yẽnd n ne yεlã fãa gilli, n yaa nimim tẽng-m-biig ne-ba, n yaa sẽn Lik n nẽ b pʋsã fãa gilli.

b sẽn bobend a Soabã, n yãs ne A bõn-naandsã rɩlgre, n yãs ne-ba, bʋɩl yĩng tɩ b yεlã na menese, Yẽnda n lambg A noang-n-taasã, n maneg n yols b yĩnga, la A sεk-b n yi yεlã fãa.

n yaa Naanda, Yẽnda la yεlã Yɩɩsda la b Yẽbgda, tɩ ka sẽn da ges bũmb a to n maan ye.

n yaa Bʋgsgo, Yẽnda n waoogd A yembsã la A yolsd-ba, la A kõt-b b sẽn kote.

Yẽnd n sekd A yembsã, b sẽn tar tʋlsem ne bũmb ning fãa, la Yẽnda me la b leb n sekd b mense ne A Sõngrã, n yi zẽng sẽn ka Yẽ fãa, b leb n sekda b mens ne-A n yi bũmbã fãa gilli.

n yaa Yaafda, Yẽnda n gũud A yembsã n yi b zunuubã wẽnga, n ka sɩbgd-b a zug ye.

Lɩslaam tagsdame n getẽ Wẽnd naanegã yel-soalema la A sẽn yols yεlã, sẽn be rẽnda pʋgẽ, yaa bon-naandsã sẽn get sõma b koam-bãanegã, n tar yã-beedo n na n rɩlg-ba, n leb n ning b toaag a pʋgẽ halɩ n tall-a n ges hal t'a wa tõe n tɩ tik a menga, rẽnd yɩlgr be ne sẽn naana bãmbã wã, n leb n bʋke sẽn yi A Bʋkrã pʋgẽ, ne A sẽn segle n kõ bõn-naandga bũmb ningã sẽn na sõng-a wã, n leb n maneg a halhaalã, n lɑgem ne a sẽn yaa valangã fãa.

Nabiyaama a Mʋhammad, -Wẽnd pʋʋsg la A tɩlgr be a yĩnga-

A yeelame A Naam Zẽkame: ﴾Sɩd lɑ hɑkɩɩkɑ, Tẽn-tʋʋm wɑɑ yãmb nengẽ sẽn yi yãmb pʋgẽ, yɑɑ toog ɑ zug bũmb ning sẽn nɑmsd yãmbã, n mɑɑn yã-beed ne yãmb nɑ kãnde, n yɑɑ nimbãɑn-zoεtɑ n yɑɑ yolsdɑ ne sɩd-kõtbã﴿ [Attɑoobɑ: 128]. A yeelame A Naam Zẽkame: ﴾La Tõnd pa tʋms foom rẽndame tɩ yɑɑ yolsgo ne bõn-nɑɑndsã fãɑ gil yĩngɑ. [Al-Anbiyɑɑ'ʋ:107].

A Mʋhammad -Wẽnd pʋʋsg la A tɩlgr be a yĩnga- a yaa Yolsg ninga b sẽn kõ (bon-naandsã).

Yẽnda la a Mʋhammade, n yaa a Abdʋllaah biiga, Wẽnd pʋʋsg la A tɩlgr be a yĩnga, n yaa nabiyaam-rãmbã la tẽn-tʋʋmbã Pidsda, Wẽnd tʋms-a lame- A Naam zẽkyã- ne lɩslaoongã dĩini, n tʋg nebã fãa nengẽ, bʋɩl yĩnga t'a pεεg-b n tʋg sõma, la sẽn tʋg n yɩɩd fãa, yaa Wẽnd yeembgo, la a gũ-b n yi wẽngã, la sẽn tʋg n zɩs n yɩɩd fãa, yaa lagem-n-taare.

A tũub yaa tɩlae a sẽn sagl bũmb ning fãa gillã pʋgẽ, n leb n yaa tɩlae tɩ b sɩdg-a a sẽn kõ kibay ninsã, la b zoe n zãag a sẽn gɩdge la a bugsi tɩ b bas yεl ninsã, la b ra leb n wa tũud Wẽnde, rẽndame tɩ yaa ne bũmb ninga A sẽn tuki tɩ yaa Šari n kõ tõndã.

A tẽn-tʋmdã la tẽn-tʋʋmbã sẽn reng taoorã fãa tẽn-tʋmdã, yaa bool n tʋg Wẽnd tũudũm, A Yembre, lagem-n-taag ka be ne-A ye.

Sẽn be A sɩf-rãmbẽ wã, -Wẽnd pʋʋsg la A tɩlgr be A yĩnga-:

Yaa sɩda, la yolsgo, la sũ-toogre, la sugri, la sũ-keelem, la kũuni, la zʋg-sõngo, la tẽeg tɩrga, la gãneg-m-menga, la bas-tɩ-looge.

Alkʋrãɑn wɑgellã yɑɑ mɑm Soɑbã goɑmɑ.

A yeelame A Naam Zẽkame: {Yãmb a neba! Sɩda tikr waa yãmb nengẽ sẽn yi y Soabã nengẽ, la D sikame tɩ wa yãmb nengẽ vẽenem sẽn vẽnegde.} [Annisaa'ʋ: 174 ]

Alkʋrãɑn wɑgellã yẽ yɑɑ Wẽnd gom A nɑɑm zẽkame, A sẽn sik ɑ soɑb A Nɑbiyɑɑmã zugã ɑ Mʋhɑmmɑd - Wẽnd pʋʋsg lɑ A tɩlgr be ɑ yĩnga- sẽn na yɩl t'ɑ yiis nebã ligsẽ wã n tʋg vẽenemẽ wã lɑ ɑ peeg-b n tʋg so-tɩrgã.

Ned ning sẽn kɑrm-ɑ ɑ pɑɑmdɑ keoor sẽn yɑɑ bedre, lɑ sẽn tʋmã ne ɑ kãndegrã ɑ rɩkɑ so-tɩrgã.

M rat n na n bãnga Lɩslɑoongã zeng-raadã

A yeelɑme, -Wẽnd pʋʋsg la A tɩlgr be a yĩngɑ-: (B mee lɩslaoongã zeng-raad a nu zugu, yaa maan kaset tɩ soab hakɩɩk ka be tɩ sã n pa Wẽnd ye, la a Mohammad yaa Wẽnd Tẽn-tʋʋma, la yãnes ne Pʋʋsgã la yãk Zakã n kɩse, lɑ Rɑmɑdɑɑnã no-loeere, lɑ Mɑk Roogã kɑɑgre).

Lɩslɑoongã zeng-rɑɑdã yɑɑ tũudũm-dãmbɑ sẽn zɑo Lɩslɑɑm fãɑ, lɑ ninsɑɑl lɩslɑoong kɑ mɑnegde, rẽndɑme t'ɑ loe ɑ sũurẽ wã tɩ b yɑɑ tɩlɑe lɑ ɑ mɑɑn-b fãɑ؛ bɑlɑ Lɩslɑoongã mee b zug, rẽ n kɩt tɩ b pʋd-ɑ tɩ Lɩslɑɑngã zeng-rɑɑdo.

la zeng-rɑ kãensã la woto:

rẽenem zeng-raoogã: yaa kaset maanego tɩ Soab kae sẽn tõe n tũ n tɩlg tɩ sãn pa Wẽnd ye, la a Mohammad me yaa Wẽnd Tẽn-tʋʋma.

A yeelame A Naam Zẽkame: ﴾Bɩ f bãng tɩ sẽn yɑlẽ yɑɑ tɩ Soɑb sẽn tũud n tɩlgd kɑ be rẽndɑ Wẽnde﴿ [Mʋhammad: 19]. A leb n yeelame A Naam Zẽkame: ﴾Sɩd lɑ hɑkɩɩkɑ Tẽn-tʋʋm wɑɑ yãmb nengẽ sẽn yi yãmb pʋgẽ, yɑɑ toog ɑ zug bũmb ning sẽn nɑmsd yãmbã, n mɑɑn yã-beed ne yãmb nɑ kãnde, n yɑɑ nimbãɑn-zoεtɑ n yɑɑ yolsdɑ ne sɩd-kõtbã﴿ [Attɑoobɑ: 128].

Mɑɑn kɑset tɩ Soɑb kɑ be rẽndɑ Wẽndã mɑɑnɑ: b sẽn tũud tɩ yɑɑ sɩd kɑ be rẽndɑ Wẽnde.

A Mʋhɑhmmɑd yɑɑ Wẽnd Tẽn-tʋʋmã võore: yɑɑ sɑk n tũ-ɑ, a sẽn saglã pʋgẽ, lɑ ɑ sɩdgre a sẽn kõ kibay ninsã, la b zoe n zãag a sẽn gɩdg la a bugsi tɩ b bas yεl ninsã, la b ra wa tũ Wẽnde rẽnda ne bũmb ninga A sẽn tuk tɩ yaa Šari wã.

Zeng-raoog a yiibẽ soaba:yɑɑ Pʋʋsgã yalsgo

A yeelame A Naam Zẽkame: ﴾lɑ y yãnes ne Pʋʋsgã﴿ [Al-bɑkɑrɑ: 110].

Pʋʋsgã yãnesgã yɩtɑ ne a kɩsgo wɑlɑ neng ning Wẽnd sẽn sɑglã A Nɑɑm zẽkame, t'A Tẽn-tʋʋmã wĩnig-ɑ tõndã ɑ Mʋhɑmmɑd -Wẽnd pʋʋsg lɑ A tɩlgɩr be ɑ yĩnga-.

Zeng-rɑoog ɑ tãɑbẽ soɑbɑ: yɑɑ Zɑkã kũuni.

A yeelame A Naam Zẽkame: ﴾la y kõ Zɑkã﴿ [Al-bɑkɑrɑ: 110].

Wẽnd mɑɑnɑ Zɑkã tɩ yɑɑ tɩlɑe n yɑɑ zɑrb-n-gesgɑ ne lɩslɑɑm sɩd kũunɑ sɩdem, n leb n yɑɑ bɑrk pʋʋsg ne ɑ Soɑbã ne A sẽn kõ-ɑ sẽn yɑɑ arzεkã neemã wã, n leb n yɑɑ sõngr ne tɑlsã lɑ tʋlsmã-rãmbɑ.

Lɑ Zɑkã kũunɑ yɩtɑ ne b sẽn nɑ n kɩs-ɑ neb nins sẽn sõmb ne-ɑ wã.

Lɑ ɑ yɑɑ hɑkε señ yɑɑ tɩlɑe n be arzεkã pʋgẽ t'ɑ sã n wɑ tɑ sõor ningɑ, b kõt-ɑ lɑ kõbg ɑ nii tɩ Wẽnd togs-b Alkʋrãɑn wɑgellã pʋgẽ, tɑlg lɑ nimbãɑn-ned be b pʋgẽ.

Lɑ ɑ kũunã pʋgẽ bilgr bee beenẽ sẽn yɑɑ yolsgo lɑ nimbãɑn-zoeere, lɑ yɩlgre ne lɩslɑɑm zʋgdã lɑ ɑ arzεkã, lɑ yɑrd pɑoongo tɑlsã lɑ ninbãɑn-nebẽ wã, n kengd noanglemã lɑ mɑ-biirã tõkre nebã ne tɑɑb sʋkɑ lɩslɑɑmbã zãmã pʋgẽ, rẽ yĩngɑ n kɩt tɩ lɩslɑɑm tɩrg ɑ yiisdɑ-ɑ lɑme n kõ ne ɑ yõor yɑmleoogo t'ɑ sũurã noom ne ɑ kũunã, bũmb ning sẽn be ɑ pʋgẽ sẽn yɑɑ sũ-noog kẽesg kẽesg neb ɑ tɑɑbẽ wã yĩngɑ.

Lɑ ɑrzεkã Zɑkɑ yãkrã ɑ sõorã yɑɑ 2.5% sẽn yi arzεk ning sẽn bingã sẽn yaa Sãnem lɑ Wɑnzur lɑ ligdã lɑ lɑogã b sẽn sεgleg tɩ yɑɑ koosem yingã n bɑood yõodã, t'ɑ wɑooglemã sã n tɑ sõor sẽn yãk toaagɑ n gilg n sog yʋʋmd tɩ pidi.

Wɑlɑ Zɑkã sẽn yɑɑ tɩlɑe ne ned sẽn nɑ n tɑr rũms t'ɑ sã n tɑ sõor ningɑ ( yʋgmã wã lɑ niisã lɑ rũmsã), tɩ b sã n yɑɑ rũm-dɑɑgdɩ yʋʋmdã rɑsem-dãmb wʋsgɑ fãɑ tɩ pɑ b soɑbã n rɩlgd-b ye.

Lɑ woto bɑlɑ Zɑkã yɑɑ tɩlɑe bũmb ning sẽn yit tẽngẽ wã sẽn yɑɑ bõn-bεεlɑ lɑ tɩ-biisã lɑ Sãnem-dãmbã lɑ tẽngã arzεg bugsdsã tɩ b sã n tɑ wɑooglem ningɑ.

Zeng-rɑoog ɑ nɑɑs soɑbɑ: yɑɑ Rɑmɑdɑɑn kiuugã no-loeere

A yeelame A Naam Zẽkame: { yãmb ɑ neb nins sẽn kõ sɩd ne Wẽndã b roglɑ yãmb no-loeerã wɑlɑ b sẽn dogl sẽn deng-b yãmb tɑoorã sãnd-sãnde y nɑ zoe Wẽnde} Al-bɑkɑrɑ:183

Rɑmɑdɑɑnɑ yẽ: lɑ kiuug ɑ wɑe soɑbɑ sẽn yɑɑ Higrɑ wã geelg pʋgẽ, lɑ ɑ yɑɑ kiuug b sẽn zɩsgde lɩslɑɑmbã nengẽ, ɑ tɑrɑ ziir sẽn welge n yi yʋʋmdã kiisã sẽn kellã, lɑ ɑ zãngã fãɑ noorã loeesã yɑɑ lɩslɑɑngã zeng-rɑɑd ɑ nu wã yembre.

Rɑmɑdɑɑnã no-loeerã yẽ: yɑɑ tũudm ne Wẽnde A nɑɑm zẽkame ne yõk-m-mengɑ n yi rɩɩbo lɑ yũubu lɑ kẽed-n-tɑɑre, lɑ sẽn kɑood noorã fãɑ, n sɩngd tõd-beoogã n tɩ tãɑg wĩndgã lʋɩɩse Rɑmɑdɑɑnã kiuugã sẽn yɑɑ Albɑrkã woglmã gilli

Zeng-raoog a nu soaba: Yaa Wẽnd Lohorom Roogã kaagre.

A yeelame A Naam Zẽkame: {la roga nebã tɩ b kaag Roogã Wẽnd yĩnga, sẽn paam a sor n na tʋg be,} [Aalʋ-ʿɭmraan: 97]. Hagiimdã yɩtame ne ned sẽn tar sor tõogo n tʋg beenẽ, a yaa vugri vɩɩmã pʋgẽ, yẽ me yaa Lohorom Roogã toglgo la zĩis nins sẽn yaa zĩ-yɩlma sẽn be Maka, n tʋg n maan tũudum-rãmba b sẽn mi, wakat-rãmbɑ b sẽn mi pʋgẽ, la sɩd la hakɩɩka, Nabiyaama-Wẽnd pʋʋsg la A tɩlgr be a yĩnga- maana hagiimdã, la nabiyaam-rãmb me sẽn ka yẽnda maana hagiimdã sẽn reng yẽ taoore, la Wẽnd sagla a ɭbraahiim tɩlgr be ɑ yĩnga, t'a bool nebã tɩ b wa maan hagiimdã, wala Wẽnd sẽn togs rẽnda, Alkʋrãan wagellã pʋgẽ, A Naam zẽkame, n yeele: {La moon n bool nebã tɩ b wa maan hagiimdã. B na n waa fo nengẽ n kẽnd nao la ne rũm-zombds buud toor-toore, n yit zĩ zãrg fãɑ n wɑtẽ.} {Al-haǧ 27}

M rat n na n bãnga Sɩd-kũunã (Lɩɩmaoongã) zeng-raado:

B soka Nabiyaamã -Wẽnd pʋʋsg la A tɩlgr be a yĩngɑ- Sɩd-kũun sẽn yaa a soaba, t'a yeele: (Yɑa f kõ sɩd ne Wẽnde, la A malεgsã la A Gaf-rãmbã la A tẽn-tʋʋmbã la laahr (yaoolem) daarã, la f kõ sɩd ne kordgã (A Pʋlʋngã), a noogo la a toogo) Sɩd-kũunã zeng-raadã, bãmb lɑ sũurẽ tũudum-rãmbã, sẽn ya tɩlae n zao ne lɩslaam fãa gilli, la ninsaal lɩslaoong ka manegde, rẽndame t'a loe a sũurẽ wã ne-a n wãage, rẽ n kɩt tɩ b pʋd-a tɩ sɩd-kũun (lɩɩmaoongo) zeng-raado, la yẽnda ne lɩslaoongã zeng-raadã welgrã, yaa tɩ lɩslaoongã zeng-raadã, bãmb yaa tʋʋmd sẽn yaa vẽenega, tɩ ninsaal maand-b ne a yĩn-wilã, wala fo sẽn na n yeel Kaset (Šahd) a yiibã la Pʋʋsgã la Zakã, la sɩd-kũunã (lɩɩmaoongã) zeng-raadã bãmb yaa sũurã tʋʋma tɩ ninsaal maand-b ne a sũurã, wala: kõ-sɩd ne wẽnde la A Gaf-rãmbã la A Tẽn-tʋʋmbã.

Sɩd-kũunã sẽn rat n na n yeelgã la a võorã: la yẽnda yaa sũurã sɩdgrã sẽn loe ne Wẽnde, la A malεgsã, la A Gaf-rãmbã la A Tẽn-tʋʋmbã, la yaoolem raarã, la Alƙadrã (Pʋlʋngã), ɑ noogo, la a toogo, la Nabiyaamã sẽn wa ne bũmb ningã pʋgbo -Wẽnd pʋʋsg la A tɩlgr be a yĩnga- lɑ ɑ mɑɑnego: n gom ne zelemde, wala yeelgo: "tɩ soab ka be tɩ sã n ka Wẽndã". La Alkʋrãanã karengo, la Sʋbhaanallaah la Laa'ɩlaaha ɭllallaah maanego, la Wẽnd pẽgrã.

a leb n yaa tʋʋma ne yĩn-wil nins sẽn vẽnegã, wala Pʋʋsgo, la no-loeere, la hagiimdu, la yĩn-wil nins sẽn solgã, sẽn yag ne sũurã, wala Wẽnd noanglemã la A zoeesã la bobl-f-meng ne-A, la maan pʋ-peelem ne-A.

La bãngdbã togsd-a lɑ koεεg-koεεga, tɩ yẽnda yaa: loεεg ne sũuri, la yeelg ne zelemde, la tʋm ne yĩn-wila, a paasdame ne tũudum, n poogd ne Wẽnd kɩɩsgo.

Zeng-raoog rãeenga: yaa kõ-sɩd ne Wẽnde

A yeelame A Naam Zẽkame: {Ad sɩd-kõtbã la neb nins sẽn kõ sɩd ne Wẽndã } [Annuur 62]

Kõ-sɩd ne Wẽndã, tũudɑ ne A yembgo A Rʋbʋʋbɩya wã pʋgẽ (sobendẽ wã,) la A Ʋlʋʋhɩya wã pʋgẽ (A tũubẽ wã) la A Asmaa'ʋ pʋgẽ ( A yʋy wã) la A Sɩfaatẽ wã ( A sɩf-rãmbẽ wã) yẽ me yaa bũmb sẽn kʋmbd sẽn watã:

Yaa f kõ sɩd ne A belmã, A Naam yɩlgame n zẽke.

Kõ-sɩd ne A sobendã, (Rʋbʋʋbɩya) A Naam yɩlge n zẽke, la A yaa bũmbã fãa Soaada, la a naanda, la a rɩlgda, la a yellã Rabsda.

Yaa kõ-sɩd ne A Ʋlʋʋhɩyã wã (A tũudmã), A Naam yɩlgame, la yaa Yẽ me n sõmb ne tũudumã Yẽnd A Yembre lagem-n-taag ka be ne-A bũmb baa a yembr pʋgẽ ye: sẽn be b pʋgẽ: yɑɑ Pʋʋsgã, la doaag kosgo, la pʋlʋngo, la kodgre, la sõngr kosgo, la gũudum kosgo, la tũudum-rãmbã fãa gill a taabã.

la kõ sɩd ne A Asmaa'ʋ wã ( A yʋyã) sẽn maneg zãngã la A sɩf-rãmbã sẽn zẽkã, A sẽn sɩf A Mengã ne wã, maa A Nabiyaamã sẽn sɩf-A ne wã -Wẽnd pʋʋsg la A tɩlgr be a yĩnga- la fo bas bũmb ning Wẽnd sẽn ka sɩf ne-A mengã, maa A nabiyaamã me ka sɩf-A ne-a -Wẽnd pʋʋsg la A tɩlgr be a yĩnga- sẽn yaa yʋy la sɩf-rãmba, la kõ sɩd t'A yʋyã la A sɩf-rãmbã, b taa tεka pidb la sõmblem wεεngẽ, la ad bũmb ka be n wõnd-A, Yẽ n leb n yaa Wʋmda n yaa Neta.

Zeng-raoog a yiib soaba: yaa kõ-sɩd ne malεgsã

A yeelame A Naam Zẽkame: {Pẽgr be ne Wẽnde, sẽn yɑɑ sɑɑs lɑ tẽng Naandã, sẽn mɑɑnɑ Malεgsã tɩ yaa tẽn-tʋmdbã, sẽn tɑr pɩgs ɑ yiib-yiib lɑ tãɑb-tãɑb lɑ nɑɑs-nɑɑse, A pɑɑsdɑ A sẽn dɑt nɑɑnegã pʋgẽ, ad A yɑɑ bũmb fãɑ Tõodɑ.} [Faaṭɩɩrʋ 1]

D kõta sɩd tɩ malεgsã yaa dũni sẽn solg ne tõndo, la ad b yaa Wẽnd yembse, A naan-b lame ne nuura (vẽenem), n maan-ba tɩ b yaa tũudba, n yaa gãneg-m-mens-rãmb ne-A.

La bãmb yaa bõn-naands sẽn yaa wʋsgo, b pãngã la b sõorã ka tõe bãng a tεka sã n ka Wẽnde A Naam zẽk yã, la b yembr fãɑ tɑra sɩf-rãmba la yʋy la tʋʋma Wẽnd sẽn welg ne-ba, lɑ sẽn be b pʋgẽ yaa a Gibriil tɩlgr be a yĩnga, b sẽn bobl a soab ne Wahɩ wã, t'a sigd ne-a n yi Wẽnd nengẽ A Naam zẽkame, n tʋgd A tẽn-tʋʋmbã nengẽ.

Zeng-raoog a tãab soaba: yaa kõ-sɩd ne Gaf-rãmbã

A yeelame A Naam Zẽkame: {Yeel-y: "d kõo sɩd ne Wẽnd lɑ A sẽn sik n kõ tõndã lɑ A sẽn sik n kõ a ɭbrɑɑhɩɩm lɑ ɑ ɭsmɑɑɩɩl lɑ a ɭshɑɑk lɑ a Yɑ'ɑƙuub lɑ Yɑgensã lɑ b sẽn kõ ɑ Muusɑ lɑ ɭɩsɑ lɑ b sẽn kõ Nɑbiyɑɑm-rãmbã sẽn yi b Soɑbã nengã wã, tõnd pɑ welgd bɑɑ a yembr b pʋgẽ ye, tõnd me yɑɑ sɑk-n-tũ-rãmbɑ ne-A} [Al-bakara: 136]

Kõ-sɩd sẽn kenge, tɩ ad Gaf-rãmb nins sẽn sig saasẽ wã fãa gilli, yaa Wẽnd goama.

la ad b sik-b lame n yi Wẽnd nengẽ A nɑɑm yɩ wɑgelle n zẽke, n kõ A Tẽn-tʋʋmbã, tɩ b tʋg ne A yembsẽ wã, tɩ yaa sɩda sẽn yaa vẽenega.

la d kõ sɩd tɩ Wẽnde, A Naam yɩ wagell n zẽke, A sẽn tʋms A Nabiyaam a Mʋhammadã -Wẽnd pʋʋsg la A tɩlgr be a yĩnga- n tʋg nebã fãa gill kεp nengẽ wã, A yẽesa ne a Mʋhammad Šari wã Šari-rãmb a taab nins sẽn da reng taoorã, la A maan Alkʋrãan wagellã, tɩ yẽ yaa sẽn wa n ta n yãmb gaf-rãmb nins fãa sẽn da reng taoor n sig saasẽ wã, a leb n yẽes-bɑ, la ad Wẽnde, a reega A zugẽ, n na n gũus Alkʋrãan wagellã n yi tedgr buudu, maa toeengo, t'A yeele, A Naam Zẽkame: {Ad yaa Tõnd n sik Alkʋrãanã, la ad yaa Tõnd n na n gũ-a.} [Al-hiǧri 9], Bala Alkʋrãan wagellã, la Wẽnd Gaf-rãmbã baasdga, A Naam zẽkame, n tʋg ninsaalbẽ wã, la A Nabiyaam a Mʋhammad -Wẽnd pʋʋsg la A tɩlgr be a yĩnga- yẽ la tẽn-tʋʋmbã fãa baasdga, la lɩslaoongã dĩinã, yẽ la dĩin ninga Wẽnd sẽn yar-a ne ninsaalbã, n na n tʋg n tãag dũni yikri, Wẽnd yeelame, A Naam zẽkame: {Ad Dĩinã Wẽnd nengẽ yɑɑ Lɩslɑoongã} [Aalʋ-ʿɭmraan: 19].

La saasẽ Gaf-rãmb nins Wẽnd sẽn togsb-ɑ -A nɑɑm zẽk yã- A Gafã pʋgẽ wã, bãmb yaa:

Alkʋrãan wɑgellã: Wẽnd sik-a lame, A nabiyaam a Mʋhammad zugu -Wẽnd pʋʋsg la A tɩlgr be a yĩnga-

Taooraatã- Wẽnd sik-a lame, A Nabiyaam a Muusa zugu, tɩlgr be a yĩnga.

Lingiilã: Wẽnd sik-a lame, A Nabiyaam a Iisa zugu, tɩlgr be a yĩnga.

Zabʋʋrã: Wẽnd sik-a lame, A Nabiyaam a Daawʋʋd zugu, tɩlgr be a yĩnga.

A ɭbraahɩɩm gaf-rãmbã, Wẽnd sik-b lame, A Nabiyaam a ɭbraahɩɩm zugu, tɩlgr be a yĩnga.

Zeng-raoog a naas soaba: yaa kõ-sɩd ne tẽn-tʋʋmbã

A yeelame A Naam Zẽkame: {Lɑ ad Tõnd tʋmsame tɩ kẽng zãma fãa nengẽ Tẽn-tʋʋma, (t'ɑ yeel-ba): "tũ-y Wẽnd la y zãag rʋbsã}. [Annaẖlʋ :36]

Yaa sɩdgr sẽn kenge, tɩ ad Wẽnde, A Naam zẽkame, A tʋmsa zãma fãa pʋgẽ tẽn-tʋʋma, tɩ boond-b n tʋgd Wẽnd tũudumã, Yẽnd a Yembre lagem-n-taar ka be ne-A ye, la b kɩfleg ne bũmb ning fãa sẽn tũudi zẽng sẽn ka Wẽnde, A Naam zẽkame.

la b kõ sɩd tɩ ad b (tẽn-tʋʋmbã) fãa gilli, b yaa yĩng rãmba, n yaa rapa, n yaa Wẽnd yembse, b yɑɑ sɩd-rãmbɑ n yɑɑ b sẽn sɩdgb-rãmba, n yaa Wẽnd zoεtba, n yaa bas-m-yam-rãmba, n yaa kãndagdba, n yaa pεεgdba, Wẽnd keng-b lame ne yel-soalem-rãmba, sẽn wiligdi b sɩdã, la Wẽnd sẽn tʋm-b ne yel ninsã fãa gilli b taasame, la b fãa gilli b ra bee sɩd la kãndagr sẽn yaa vẽeneg zugu.

la b boollã fãa zemsa taaba, sẽn na n sɩng b sɩngrẽ n tɩ tãag b baasgẽ wã, sã n yaa ne dĩinã yẽgr wεεngẽ, yẽ me la Wẽnd yeembgã -A naam yɩ wagell n zẽke- tũudumã pʋgẽ la b ra maan lagem-n-taarã ne-A wã.

Zeng-raoog a nu soaba: yaa kõ-sɩd ne laahr (Yaoolem) raarã

A yeelame A Naam Zẽkame: {Yaa Wẽnde, soɑb kɑe sẽn tũud n tɩlge rẽndɑ Yẽ, A nɑ n tigmɑ yãmb neere ãndũn-yikr rãɑrã, sik kɑ be, lɑ ãnd goɑm sɩdɑ n le yɩɩd Wẽnde?} [Annisaa'ʋ 87]

Yaa sɩdgr sẽn kenge, ne bũmb ning fãa sẽn kẽed ne Yaoolem raarã, tõnd Soabã, A naam yɩ wagell n zẽke sẽn togs bũmb ningã, A Gaf wagellã pʋgẽ, maa tõnd Nabiyaamã, a Mʋhammad, Wẽnd pʋʋsg la A tɩlgr be a yĩnga, sẽn yẽs tõndã, wala ninsaal kũumã la yikrã kũumã poorẽ wã, la alƙɩyaoom raar seg-taabã, la Šafaa'ʿʋ wã ( sugsgã) la miizaanã (zɩslem peesgã) la hɩsaabã (Geelgã), la arzãnã la Bugmã, la zẽng sẽn ka rẽ sẽn yag ne Yaoolem raarã.

Zeng-raoog a yoob soaba: yaa kõ-sɩda ne Alƙadrã (pʋlengã), a sẽn noom la a sẽn toe

A yeelame A Naam Zẽkame: {ad Tõndo, bũmbã fãa D naan-a lame ne geelgo.} {Al-ƙamarʋ 49}

Yaa loe sũurẽ wã tɩ bũmbã fãa sẽn paamd bõn-naandsã sẽn yaa yεla dũni-kãngã pʋga, ad yaa sẽn tũ ne Wẽnd minim la A kordgo, A Naam yɩ wagell n zẽke, la A rabsgo, Yẽ, A Yembr tãa, lagem-n-taag ka be ne-A ye. A leb n bãng tɩ alƙadrã (Pʋlʋng-kãnesã) yaa bũmb sẽn gʋlse taoor tɩ ninsaal meng na n ka naan ye, la a bãng tɩ ninsaal me tara raabo la tʋlsem, la ninsaal n tʋmd a tʋʋmã hakɩɩk pʋgẽ, la rẽ fãa gillã, a ka yit Wẽnd bãngrã la A raabã la A tʋlsmã pʋgẽ ye.

Rẽnd kõ-sɩd ne Pʋlʋngã a yikda yεl a nu zugu:

a rãeenemã: yaa kõ-sɩd ne Wẽnd bãngrã sẽn gũbg bũmbã fãa wã

yiib soaba: yaa kõ-sɩd tɩ Wẽnd gʋls bũmbã fãa sẽn nɑ n yɩ n tʋg n tãag dũni Yikr raare.

Tãabo: yaa kõ-sɩd ne Wẽnd tʋlsmã sẽn yaa tɩlae tɩ yɩ wã, la A tõogã sẽn gũbgã, rẽnd A sẽn tʋll bũmb ningã yɩtame, A sẽn ka tʋllã ka yɩt ye

Naase: yaa kõ-sɩd tɩ Wẽnd lɑ bũmbã fãa nɑɑndɑ, lagem-n-taag ka be ne-A, A bõn-naandsã pʋgẽ ye.

M zamsda koom yõgbo

A yeelame A Naam Zẽkame: {ɑd Wẽnd noangɑ tuubdbã lɑ A noang yɩlgdbã} [Al-baƙara 222] A yeelame, Wẽnd pʋʋsg la A tɩlgr be a yĩnga: (Yõge wala mam koomã yõgbã buudu) Sẽn be Pʋʋsgã yellã bedrem pʋgẽ, yaa Wẽnd sẽn maan yɩlgre a taoorã, n maan yɩlgrã tɩ yaa sart ne Pʋʋsgã manegre, rẽnd yaa yẽ la Pʋʋsgã kʋlen-bila, la ning a bedrmã f yamẽ wã a maanda sũurã tɩ yaa sẽn tar noang kεgεnga n tʋg Pʋʋsgã, A yeelame-Wẽnd pʋʋsg la A tɩlgr be a yĩnga-: (Yɩlgrã, a yaa lɩɩmaoong pʋsʋka, la Pʋʋsgã a yaa vẽenem) la a leb n yeelɑme -pʋʋsg la tɩlgr be a yĩnga-: (Ned ning sẽn yõka koom, n maneg a koomã yõkre, a tʋʋm tuuti wã yita a yĩngẽ wã)

Rẽnd yamba, a tʋgda a Soabã nengẽ, t'a yaa sẽn yɩlge, yɩlgr ning sẽn ne vẽenega, ɑ sẽn mɑɑn tũudũm kãngã sẽn yɑɑ koomã yõgbo, la yɩlgr ninga b sẽn ka ne-a ne nifu, ne A sẽn maan tũudum-kãngã wã, t'a yaa sẽn yɩlg a pʋg ne Wẽnde, A naam zẽkame, n tik Nabiyaamã na-kẽndrã sorã, -Wẽnd pʋʋsg la A tɩlgr be a yĩnga-,

Bũmb ning sẽn sõmb n yõk koom n yaool n maanɑ:

1-Yaa Pʋʋsgo, sẽn wa n yaa a soab gilli, zem tɩ yaa farila maa yaa Naafɩla.

2-Wẽnd Roogã gilgrã (Ṭawaafo).

3-Alkʋrãanã sɩɩsgo

m yõkda koom la m so ne ko yɩlenga

Koom sẽn yaa yɩleng yaa: koom fãa sẽn sigd saasẽ wã maa a bulame n yi tẽngẽ wã, n ket n be a yalε wã, t'a sɩf a tãabã yembr ka tedg ye, yẽ me la a kõbgã, la a noomã la a yũuga, ka tedg ne bũmb ning sẽn tõe n yiis-a koom yɩlgemdẽ wã ye.

M zamsda koom yõgbo

rãeenem nao-yakemdã 1: yaa Anniy wã, yẽ me zĩigã yaa sũurẽ wã, la Anniy wã maaneg võore, yaa sũurã sẽn na n loe t'a na n tʋma tũudmã, tɩ yaa sẽn na n bao pẽnegre ne Wẽnde, A Naam zẽkame:

Nao-yakemda a yiib soaba 2: yaa nus tɑlɑ a yiibã pekre

Nao-yakemd a tãab soaba 3: yaa noorã wugsgu

noorã wugsgu: yẽ yaa koomã kẽesgo noorẽ wã, n wugs-a rẽ poorẽ t'a yiis-a

Nao-yakemd a naas soaba 4: yaa yõyã vẽesgo

Yõyã fẽesgo yaa f sẽn na n fõog koomã ne f vʋʋsmã n kẽes hal yõorã pʋgẽ.

Rẽ poorẽ, yaa fẽes n yiis-a: yẽ me yaa sẽn na n yiis bũmb ning sẽn be yõorẽ wã, sẽn yaa yõ-vẽto la zẽng sẽn ka yɩ rẽnda ne fẽesgo.

Nao-yakemd a nu soaba 5: Yaa nengã pegre

Nengã toaaga:

Nengã: fo sẽn togl ne bũmb ningã fãa yaa nenga.

La a yalmã tεka: yaa sẽn na n sɩng tʋbrẽ wã n tɩ tãag tʋbr a yembrã.

La sã n yaa woglemã: yaa sẽn na n sɩng zugã zoobd sẽn minim n bũldẽ wã, n tʋg n tãag lemdã tεkẽ.

La nengã pekr gũbga bũmb fãa sẽn be nengã pʋga, sẽn yaa kõbd sẽn yaa faaga, woto bala, ne peelmã n lagem ne tʋb kõbdã fãa gilli.

La sẽn yeel tɩ peelmã yaa bũmb ning sẽn be tʋb kɩdrã la tʋb vãoogã meng sʋka

La tʋb kõbdã yẽ: lɑ kõdã sẽn be kõbr ning sẽn be tʋbrẽ wã n nukã n gũbg tʋbrã gillã, sẽn yεgleg tʋbrã võorã, lɑ sẽn sedg n sɩg yepeoogẽ wã.

La woto bala, nengã pekrã gũbgda b sẽn ne wã fãa gilli, n nɑɑg ne zoob taoko sẽn yaa toεεnga zoobdã, la bũmb ning fãa sẽn zorge n yi zoobdẽ wã.

na-kẽndr ɑ 6: yaa nus a yiibã pekre, n na n sɩng nus-biyã zutu, n tʋg n tãag kãntɩɩs a yiibã

la kãntɩɩs a yiibã kẽeda nusã pekrẽ sẽn yɑɑ tɩlɑe wã.

na-kẽndr a 7: yaa zugã fãa saagre, ne nus a yiibã n lagem ne tʋbã noor vugri.

a na n sɩnga zugã sɩngrẽ, n tɩ kẽng hal kãarẽ wã, n le lebg n wa ne-ba

la a kẽes a nus-bi teesdsã a tʋb a yiibẽ wã.

la a yiisda a nus-raad a yiibã a tʋbɑ yɩngã, n saag ne bãmba tʋbrã yɩnga lɑ ɑ pʋgẽ wã.

na-kẽndr a nii soaba 8: yaa nao a yiibã pekre, n na n sɩng na-biẽ wã n tɩ tãag hal na-kʋgẽ wã, la na-kʋg a yiibã kẽeda nao a yiibã pekr pʋgẽ sẽn yaa tɩlae wã.

nao-kʋg a yiibã bãmb la: kõab a yiib nins sẽn nudg karga tẽngrã.

Koom kaooda ne yεl-kãensã:

1-Sẽn yit soy a yiibẽ wã, wala rʋʋdem la we-kεεnga, la sẽedo, la mani la mazi

2-yaa yam yikri, sẽn tũ ne gõeem sẽn zɩse, maa vũbgri, maa suubu, maa gãeemdo.

3-yaa bũmb fãa gill sẽn maand tɩ yaa tɩlae tɩ b so koom, wala Gεnaabo, la Pekre, la rogem zɩɩm.

Ned sã n maan we-kεεnga, a sõmbame n yẽes rẽgdã ne koom sẽn yaa yɩlgemde lɑ yẽnda sõmblem n yɩɩde, maa zẽng sẽn ka koom, sẽn yaa bũmb ning fãa sẽn yẽesd rẽgdã, wala kuga la vãto, la kʋdse la sẽn wõnd rẽnda, la ya a yɩ yẽesg a tãabo sẽn yɩlgde maa sẽn yɩɩd rẽ, la leb n yɩ bũmb sẽn yaa yɩlgemde, n yaa bũmb Šari wã sẽn kõ sore.

Nao-wʋʋdã la sʋsetsã saagre.

Sã n mikame tɩ f ninga nao-wʋʋd a yiibu maa sosεtse sakdame tɩ f saag-b yiibã, n ka tar tʋlsem n na n pek a nao a yiibã ye, la yaa sẽn tũ ne sart-rãmba, bãmba la:

1- yaa sẽn na n mik t'a ning-b lame a sẽn yaa yɩlgemd poorẽ, n yɩlg n yi rẽg baoonego, maa rẽg bedre, tɩ mik t'a rag n pek a nao wã yɩlgmd-kãngã pʋgẽ.

2-yaa nao-wʋʋd a yiibã yɩ yɩlgemde, n ka rẽgd ye.

3-yaa tɩ saagrã yɩ wakat ning toaag b sẽn yãk n kõ wã.

4. yaa tɩ nao-wʋʋdã yɩ n yaa halaale, wala b ra yɩ b sẽn zu maa sẽn fã ye.

Nao-wʋʋd a yiibã bãmb: yaa bũmb ning b sẽn pit naoorẽ, tɩ yaa gãongo n yaa faaga la sẽn wõnd rẽ, lɑ ɑ bilgri yaa wala neoodã nins sẽn lut na-kãseng-kãyã.

la sã n yaa ne sosεts a yiibã, yaa bũmb ning ninsaal sẽn pit a nao wã, sẽn yaa peende, la sẽn wõnd rẽnda.

4- Šari wã sẽn kõ sor ne nao-wʋʋd a yiibã saagrã hɩkma (võore).

Šari wã sẽn kõ sor tɩ b saag nao-wʋʋd a yiibã, a hɩkma (võorã), yaa sẽn na yɩlẽ n maan tɩ yɩ naana la yolse lɩslaambã zugu, rãmb nins sẽn yaa toog ne-bɑ tɩ b pidg nao-wʋʋdã n pek nao a yiibã, lɑ sẽn tʋg n yɩɩda waoodã sasa, la wala so-toɑk zugu.

Saagrã woglemã:

Sã n yaa ned sẽn be yiri: yaa raar la yʋngo, ( wakat 24 pʋgẽ)

Sã n yaa kẽnkẽnda, yaa rasm a tãabo, ne b yʋndã fãa (wakat 72)

Saagrã sõorã sɩngda geelgo, a rãeenem sɑɑgrã koomã kaoob poorẽ wã.

Saag nao-wʋʋdã zugu, a sɩfã wã (bilgrã) sẽn yaa a soaba:

1. madgdɑ nus ɑ yiibã.

2-kẽng ne nugã nao-tagdɩ wã yĩngri, n sɩng na-biẽ wã n tʋg tãag kargã sɩngrẽ.

3-Saagda rɩtg na-tallã ne rɩtg nugã la saag goabg naoorã ne goabg nugã.

Bũmb ning sẽn sãamd saagrã:

1-yaa bũmb ning sẽn mɑɑnd tɩ koom soob yaa tɩlae wã

2. yaa saagrã wakat sẽn na n sε

Koomã soobo

Kẽed-n-taar sã n zĩndi ne rawa maa paga, maa mani yii b yiibã nengẽ ne wʋm-noogo, nenem maa yaa b gõeem wakato, yaa tɩlae ne b yiibã tɩ b so, bʋɩl yĩng tɩ b na tõog n pʋʋse, maa b mɑɑn bũmb ning yɩlgr sẽn yɑɑ tɩlae ɑ pʋgẽ wã. Woto bala la paga, a sã n yɩlg n yi Pekre la rogem zɩɩm, yaa tɩlae ne-a t'a so taoor t'a na n ka pʋʋs ye maa yaa bũmb ninga sẽn yaa tɩlae tɩ b yɩlg n yaool maan-a.

la koomã soob (Sɩfa) bilgri:

Yaa tɩ lɩslaam gũbg a yĩnga gill ne koom, ɑ sẽn yɩ neng ning fãa gilli, la sẽn be a pʋgẽ, yaa noorã wugsgu la yõya fẽesgo, rẽnda a sã n gũbg a yĩngã fãa ne koom, rẽg-kãsengã zẽk n bas-a lame tɩ yɩlgrã yaa sẽn pidi.

b gɩdga ne gεnaab-soaba yεl nins sẽn watã halɩ t'a wa so koom:

01 Pʋʋsgo

02 Wẽnd Roogã gilgri (Ṭawaafo).

03 Miisr pʋgẽ zĩnd n kaoose, la sakda ne-a t'a pɩʋʋg bala, n ka zĩnd n kaoose.

04 Alkʋrãanã sɩɩsgo

05 Alkʋrãanã karengo.

Tεεma wẽebo.

Lɩslaam sã n ka paam koom a sẽn na n yɩlg a meng ne-a, maa a ka tõe n tʋm ne koomã bãag yĩnga la sẽn wõnd rẽ, la a yεεsdẽ tɩ Pʋʋsgã wakatã na n põsg-a lame, rẽnda a wẽeda tεεm ne tom.

la a sɩfã, yaa a wẽ a nus a yiibã ne tẽngã vugri n saag ɑ nengã lɑ nus tɑlɑ ɑ yiibã bala. la yaa sart tɩ tomã yɩ yɩlgemde.

Tεεma wẽeb sãɑmdɑme ne yεl-kãensã:

1-Tεεmã wẽeb kaoodame ne bũmb ning sẽn kaood koomã yõgbã

2-Koom sã n paam taoor tɩ yẽ na ka sɩng tũudum ning a sẽn wẽ tεεmã n na n maanɑ

M zãmsda Pʋʋsgã

Wẽnd rogla lɩslaama, wĩndg la yʋng pʋgẽ, Pʋʋs-rãmb a nu, bãmb me yaa Fagiri la Zafare la Laasare la Magriba la Sãanfo.

M segendame n na n pʋʋse

Pʋʋsgã wakat sã n ta, lɩslaam yɩlgda a menga n yi rẽg-bãanese la rẽg-bεda, sã n mikame t'a rẽgma rẽgd sẽn yaa bedre.

Rẽg-bedrã, yẽnda yaa bũmb ning sẽn mɑɑnd tɩ yaa tɩlae ne lɩslaam t'a so wã.

La rẽg-bãanegã, yẽ yaa bũmb ning sẽn mɑɑnd tɩ yaa tɩlae ne lɩslaam t'a yõk koomɑ.

Lɩslaam pʋʋsda ne fut sẽn yaa yɩlgemde, zĩig sẽn yaa yɩlgemde n yi rẽgdo, t'a yaa sẽn lud a yãndã.

Lɩslaam nagda ne fut sẽn toge Pʋʋsgã wakato, n lud a yĩnga ne fuugã, la ka sõmb ne rao Pʋʋsg pʋgẽ t'a vẽneg bũmb sẽn be yũugã ne rũmã sʋk ye.

yaa tɩlae ne paga t'a lut a yĩnga fãa Pʋʋsgã pʋgẽ, sã n ka a nengã la a tal a yiibã.

Lɩslaam ka gomd Pʋʋsgã pʋgẽ, rẽnda wala goam nins sẽn welge toor ne Pʋʋsgã, la a sĩndame n kelgd limaamã, a ka wẽnesd a Pʋʋsgã pʋgẽ ye, la a sã n ka tõe n rʋls goam nins sẽn welg toor ne Pʋʋsgã, rẽnd a tẽegda Wẽnd Yʋʋre, n maan Sʋbhaanallaah halɩ n wa tɩ sεεs Pʋʋsgã, la yaa tɩlae ne-a t'a yãge n zãms Pʋʋsgã la a karem Pʋʋsgã gom-biisi.

M zãmsda Pʋʋsgã

rãeenem na-yakemdã 1: yaa Anniy wã rɩkre ne faril ning yẽ sẽn rat n na n kõ wã, la a zĩigã yaa sũurẽ wã.

M sẽn yõk koomã n sε poorẽ, m teesda Alƙiblã n pʋʋs tɩ m yaa sẽn yase m sã n tõe rẽnda.

na-kẽndr a yiib soaba 2: m zẽkda m nus a yiibã, n yεgl m bãgd a yiibã, n yeele:" Allaahʋ Akbarʋ" tɩ m yaa sẽn maan m Anniy wã, n na n kẽ Pʋʋsgã pʋgẽ.

na-kẽndr a tãab soaba 3: m karemda Pʋʋsgã pakr doaaga, bũmb ning sẽn wa n yi Nabiyaamã nengẽ wã, la sẽn be rẽ pʋgẽ, yaa yeele: (Sʋbhaanaka Allaahʋmma wa bɩ hamdɩka, wa tabaaraka'smʋka, wa ta-ʿaalaa ǧaddʋka, wa laa'ɩaaha Gayrʋka= m Soab a Wẽnde, F yɩlgame, la m pẽgd-Fo, F Yʋʋr yɩ wagelle, F zɩslem zẽkame, soab ka be zẽng sẽn ka Foom ye) na-kẽndr a naas soaba 4: m kota gũudum n yi a sʋɩtãana, b sẽn rig a soab n zãag yolsgã, n yetẽ: (Aʿʋʋzʋ Billaahɩ Minaš-šayṭaanir-ragiim) na-kẽndr a nu soaba 5: m karemda Alhamdo, rakaar fãa pʋgẽ, yẽ me lɑ: D na n sɩnga ne Wẽnd Yʋʋrã Albarka, sẽn yaa Dũni yols-zãng Naabã, n leb n yaa Sɩd-kõatbã welg n yols Naabã (1) Pẽgr tiging be ne Wẽnde sẽn yɑɑ bõn-naandsã Nɑɑbã (2) sẽn yɑɑ dũni gubg-n-yols Nɑɑbã, n yɑa Yɑoolem raar welg-n-yols Nɑabã (3) n yɑ dĩinã rolb rɑɑr Nɑɑbã (4) Foo bɑl lɑ d tũudɑ, lɑ Foo bɑl lɑ d kot sõngre (5) kãndg-d n tʋg so-tɩrgẽ wã (6) B rãmb nins Fo sẽn mɑɑn neemã b zugã sore, zẽng tɩ pɑ B sẽn gẽ-b rãmbã, pɑ sẽn menembã sore.(7))

M karemda Alhamdã poorẽ, bũmb ning sẽn yaa naana ne maam Alkʋrãanã pʋgẽ, rẽenem rakaarẽ wã lɑ yiibẽ soabã tεkɑ Pʋʋsgã fãa pʋgẽ, la woto ka bũmb sẽn yaa tɩlae ye, la ad yaa keoor sẽn yaa zɩsgo n be ɑ mɑɑnegã pʋgẽ.

Na-kẽndr a yoob soaba 6: m yetame: " Allaahʋ Akbarʋ", rẽ poorẽ tɩ m maan Rukuu (zõonde), halɩ tɩ m poorã zems tɑɑbɑ n yaa sas, tɩ m nus a yiibã yaa sẽn be m rũm a yiibã zugu n yɑɑg nus-bi wã, rẽ poorẽ tɩ m yeel Rukuu wã: "(Sʋbhaana Rabiya Al-ʿAzɩɩm" m Soab Zɩsgã yɩlgame).

Na-kẽndr a yopoe 7:soaba: m roogdame n yi Rukuuẽ wã, n yeele (Samiʿa Allah lɩman hamɩdahʋʋ), tɩ m yɑɑ sẽn zẽk m nus a yiibã n tɩ zems ne m bãgdã, tɩ m yĩnga yõgne, n yals n yeele: "(Rabba naa walakal hamdʋ).

Na-kẽndr a nii: 8 soaba: m yetame: "Allaahʋ Akbarʋ, n maan Suǧuudu m nus a yiibã la m rũm a yiibã la m na-tagds a yiibã la m rĩirã la m yõorã zugu, la m yeel m Suǧuudɑ pʋgẽ (Sʋbhaana Rabiya Al-ʿalaa= m Soab Zẽkdgã Naam yɩlgame)

na-kẽndr a wae:9 soaba: m yetame: Allaahʋ Akbarʋ= Wẽnd n yɩɩd bedrem) n rooge n yi Suǧuudẽ wã halɩ n wa zĩnd zãnga, tɩ m poorã yaa sẽn tẽege, n zĩ goɑbg na-tagdrã zugu, n sel rɩtg naoorã, n yeele: (Rabɩɩ ɩgfɩr lɩɩ= m Soab a Wẽnde, yaaf-ma).

Na-kẽndr piig soaba: m yetame: (Allaahʋ Akbarʋ) Wẽnd n yɩɩd bedrem) n lebg n tiuul (maan Suǧuudu) yεsa wala rẽenem Suǧuudã.

Na-kẽndr piig la a yembre: m roogdame n yi tiuulgẽ (Suǧuudẽ) wã, n yeele: Allaahʋ Akbarʋ= Wẽnd n yɩɩd bedrem) halɩ n wa tʋg n tẽege, n yals tɩrga, la m maanda Pʋʋsgã Rakaar-rãmbã sẽn kellã fãa pʋgẽ, wala m sẽn maan rẽenem Rakaarã bilgri.

Zafarã la Laasarã la Magribã la Sãanfã rakaar-rãmb a yiibã loogr poorẽ, m zĩndidame, n maan Attašahʋd rẽengã, la yẽ me la: (Attahɩyaatʋ Lɩllaahɩ, waṣṣalawaatʋ waṭṭaybaatʋ, assalaamʋ ʿalayka, ɑyyʋha'nnabɩyyʋ, wa rahmatʋllaahɩ, wabarakaatʋhʋʋ, assalaamʋ ʿalaynaa, wa ʿalaa ʿɩbaadɩllaahɩ aṣṣaalɩhɩɩna, ašhadʋ anlaa ɩlaaha ɩlla Allaahʋ, wa Ašhadʋ anna Mʋhammadan ʿAbdʋhʋʋ wa rasʋʋlʋhʋʋ = Pʋʋs-rãmb be ne Wẽnde, fãagr la Yɩlmɑ be ne Wẽnde, Tɩlgr be ne foom a Nabiyaama, la Wẽnd yolsg la A barka, Tɩlgr be ne tõnd la Wẽnd yemb sõmsã, m tabenda m sũurẽ ne hakɩɩk tɩ soab sẽn na n tũ n tɩlg kae rẽnda Wẽnde, la m maand kaset t'a Mʋhammad yaa A yamb la A Tẽn-tʋʋma) Rẽ poorẽ tɩ m leb n yik n kẽng Rakaar a tãab soabã wãnde poorẽ. Raka baasgã poorẽ, Pʋʋsg fãa pʋgẽ, m zĩndidame n karem Šahd baasdgã, yẽ me la woto: (Attahɩ yaatʋ lɩllaahɩ, waṣṣalawaatʋ waṭṭaybaatʋ, Assalaamu Alayka Ayyʋhannabiiyʋ wa rahmatʋllaah wabarakaatʋhʋʋ, Assalaamʋ ʿAlaynaa, wa ʿalaa ʿɩbaadɩllaah Aṣṣaalɩhɩɩna, Ašhadʋ an laa'ɩlaaha ɩllallaah, wa Ašhadʋ Anna Mohammadan ʿAbdʋhʋʋ Warasʋʋlʋhʋʋ. Allahʋmma ṣallɩ ʿAlaa Mohammadɩn wa' ʿalaa aalɩ Mohammadɩn, kamaa ṣallayta ʿAlaa ɭbraahɩɩma wa ʿalaa aalɩ ɭbraahɩɩma, ɩnnaka hamiidʋn maǧiidʋn, Allahʋmma baarɩk ʿalaa Mohammadɩn wa ʿalaa aalɩ Mohammadɩn, kamaa baarakta ʿalaa ɭbraahɩɩma wa ʿalaa aalɩ ɭbraahɩɩma innaka hamiidʋn maǧiidʋn.)

na-kẽndr piig la a yiib soaba: rẽ poorẽ, m ningda sallem goabg wεεngẽ, n yeele (Assalaamu ʿAlaykum wa rahmatʋllaahɩ) la m ning sallem m rɩtg wεεngẽ n yeele: (Assalaamu ʿAlaykum wa rahmatʋllaahɩ) tɩ m yaa sẽn maan Anniy wã n na n yi Pʋʋsgã pʋgẽ la woto mam yaa sẽn kɩs Pʋʋsgã.

Lɩslaam poak hɩǧaabe (ludbu)

A yeelame, A Naam Zẽkame: {Yaa foom a Nabiyaamã! Yeel f pɑgbã lɑ f kom-pugli wã lɑ muumin-rãmbã pɑgbã, tɩ b woglg b fʋ-bεdã n mɑɑn tɩ kɩll n pẽnege, tɩ rẽnd n pẽ ne b nɑ bãng-ba, n kɑ mɑɑn tɩ nong tɑ-b ye, lɑ Wẽnd yɩɩme n yɑɑ Yaafda n yaa Yolsdɑ} [Al-Ahzaab: 59] Wẽnd maaname tɩ yaa tɩlae n rog ne lɩslaam poaka t'a lud a menga la a lud a yãndã la a yĩngã fãa gilli n yi ra-zẽmse, ne fut ninsi b sẽn minimi b tẽngẽ wã. La ka sõmb ne-a t'a yãk a ludbã sã n ka a sɩd taoore maa maa a rog-pẽtba, bãmb me la neb nins lɩslaam poak sẽn ka tõe n fur-bã, tɩ ka tõe n furã yaa lae-lae, bãmb me: (Yaa ba, baa t'a sẽn n zẽke (yaaba), la biiga baa t'a sã n sigi (yagengɑ), la sɑɑm-bi la kãsemse la yεs-rãmba, la tão, la tão biiga la tao poak biiga, la ma sɩda, la sɩda baaba, baa t'a sã n zẽke, ( yaaba) la sɩda biiga, baa t'a sã n sigi, (yagenga), la tão yẽseng wεεngẽ, la mɑ-yẽsmd sɩda. La yẽsengã haramda (gɩdgdɑ) bũmb ning sẽn gɩdgɩd buudẽ wã)

La lɩslaam poak gũusda a yeremẽ wã yεl sãnda:

Pipi soaba: yaa yĩngã fãa gũbgri.

Yiib soaba: yaa tɩ pag sẽn yer bũmb ningã ra yɩ nagem ye

Tãab soaba: yaa t'a ra yɩ yãasenga n vẽnegd a yĩnga ye.

Naas soaba: yaa t'a yɩ yalgemde, n ka yɩ sẽka, n wĩnigd a yĩngã ye.

Nu soaba: yaa t'a ra ning-a parfẽ ye.

Yoob soaba: yaa t'a ra wõneg rao fut ye.

Yopoe soaba: yaa t'a ra wõneg sẽn ka lɩslaam pogsã fʋtã b tũudumẽ wã maa b tigã fut ye.

Sẽn yi Muumin (sɩd-kõt) sɩf-rãmbẽ

A yeelamem A Naam Zẽkame: {Neb nins tɩ b sã n tẽeg Wẽnd yell bɩ b sũyã rigdã, bãmb bɑl lɑ sɩd-kõtbɑ; lɑ b sã n kɑrem A goɑmɑ me tɩ b wʋme, ɑ pɑɑsd-b sɩd-kũuni, lɑ b Soɑbã me lɑ b bobẽnd b mensã.} [Al-anfaalʋ :2 ]

A yaa sɩd-soaba, a goam pʋgẽ a ka yagd zĩri ye.

A pidsda alkaoole la pulʋngo.

A ka wẽngde zabr pʋgẽ.

A lebsda bobelle.

A noanga ne a ma-bi taaga bũmb ning a sẽn noang ne a menga

A yaa kõta.

A manegdame n tʋgd nebã.

A tõkda rogem.

A yarda ne Wẽnd kordga la a pʋʋsd-A barka yol-yol sasa la a maand sugri keelem wakato

A yaa yãn-zoεta.

A yolsda bõn-naandsã.

A sũurã tɩlgame n yi sũ-kĩiri, t'a yĩn-wilã tɩlg n yi maan-n-zʋʋg nebã zugu

A basdame tɩ loogd nebã yĩnga.

A ka rɩt rɩbaaga a ka tʋm ne rɩbaaga.

A ka yoode.

A ka yũud rãam.

A manegdame n tʋgd a yagsã.

A ka wẽgde, a ka zãmbde.

A ka zuudi la a ka maand sɩlem ye.

A yaa manegd ne a roagdb a yiibã, baa tɩ b sã n ka lɩslaamba, la a tũud b noore manegr pʋgẽ.

A wubda a koambã zʋg-wagell zugu, la a wiligd-b Šari wã yεla, la a gɩdg-b n yit zʋg-wẽnse la haraam-rãmba.

A ka wõnesd a meng ne zẽng sẽn ka lɩslambã tʋʋma, sẽn yaa b dĩinã yεlẽ, maa b rog-n-mikã yεl nins sẽn lebg vũun ne bãmbã.

Mam sũ-noogã mam lɩslaoongã dĩinã pʋgẽ

A yeelame, A Naam Zẽkame: (Ned ning sẽn tʋma sõma, yaa rɑoa tɩ yɑɑ paga, tɩ yẽ yaa sɩd-kõta, D na vɩɩms a soab vɩɩm sẽn yaa yɩlenga, la D na rol-b keoor sõmblem sẽn yɩɩd b sẽn da yɩ n tʋmdã.) [Annaẖlʋ: 97] Bũmb sẽn tʋg n yɩɩd sẽn kẽesd sũ-noogo la yardo lɩslaam sũurẽ wã, yaa a sẽn kell n tʋk tɩrga ne a Soabã n ka baood ned na kẽ a sʋka, zem tɩ yaa vɩtbẽ wã maa yaa kiidbẽ wã, bɩ yaa rʋbse, bala Wẽnde, A Naam zẽkame, a togsa a Gaf wagellã pʋgẽ, t'A yaa pẽt ne A yembsã wakat fãa, A wʋmd-b lame, A reegda b kosgã, wala A sẽn yeele, A Naam zẽkame: (lɑ Mɑm yembsã sã n sok foo Mɑm yelle, rẽnd Mɑm pẽeme, M deegdɑ boɑand boolgo, t'ɑ sã n bool-Mɑ, bɩ b mɑɑn M sẽn nɑ reeg b yĩngɑ lɑ b kõ sɩd ne-Mɑ tɩ sãnd-sãnde b nɑ kãnde) [Al-baƙara: 186], La A sagla tõndo, A Naam yɩlgame, tɩ d kos-A, n maan yel-kãngã tɩ yaa tũudum-rãmb sẽn yɩɩd zɩslem, lɩslaam sẽn baood pẽnegr ne a Soabã nengẽ, ne A sẽn yeele, A Naam yɩ wagell n zẽke: {la yãmb Soaba yeelame: "kos-y-Ma tɩ M na reeg y yĩnga} [Gaafɩr: 60], Rẽnd lɩslaam sẽn yaa tɩrga, wakat fãa a tara tʋlsem n tʋg a Soabã nengẽ, la a koat-A wakat fãa, la a baood pẽnegr ne Wẽnde ne tũudum-rãmb nins sẽn yaa sõmã wã:

La Wẽnd maana tõndo, dũni-kãngã pʋga, A Naam zẽkame, ne bũmb ning yĩnga sẽn yaa bedre, A ka naan tõndo zaalem ye, yẽ me la Wẽnd tũudum, A Yembr tãa, lagem-n-taag ka be ne-A ye. La A maana dĩin n kõ tõndo sẽn yaa Wẽnd dĩini, sẽn gũbg fãa gilli, n kʋmbd tõnd vɩɩmã yεlã fãa gilli, sẽn welge, la sẽn gũbgi. La A leb n gũ ne Šari-kãngã sẽn yaa tẽeg-tɩrgã vɩɩmã yεl nins sẽn yaa tɩlae wã, yẽ me yaa dĩinã, la d yõyã la d burkĩndã la d yamã la d arzεgsã. La ned ning sẽn vɩɩma n tũud Šari wã saglsã, n zãagd a menga ne haraam-rãmbã, rẽnd yẽ soabã, a gũusa yεl-kãensã sẽn yaa tɩlae wã, a vɩɩmdame ne zu-noogo, a sẽn tar yĩn-yõgnego a vɩɩmã pʋgẽ, sik sẽn ka be.

La lɩslaam tõkrã ne a Soabã, a yaa bũmb sẽn zulme, n maan yĩn-yõgnego la bas-m-yam la sũ-noogo, n leb n ningd a yamẽ wã ne Wẽnd sẽn be ne-a wã, A Naam yɩ wagell n zẽke, la A sẽn sõngd-a wã, la A sẽn noang A yambã sẽn yaa sɩd-kõtã, Wẽnd yeelame, A Naam zẽkame: {Wẽnd lɑ sɩd-kõtbã lɑlldɑ, A yiisdɑ bãmbɑ ligsẽ wã n tʋgd vẽenemẽ wã} [Al-bɑƙɑrɑ: 257]

Tõk-n-ta-kãngã sẽn yaa zɩsgã, a yaa halhaal ninsaal sẽn wʋmd-a a yĩngẽ wã, t'a talled-a t'a paam wʋm-noogo ne Arrahmaan (Yolsg Naabã) tũudum, n tar nonglem kεgεnga, n na n yεk-A, n yɩkd ne sũurã n tʋgd zu-noog saagẽ ne a sẽn wʋmde lɩɩmaoongã noomã.

noog-kãnga, noomã sẽn ka tõe n bilgã sã n ka ned ning sẽn leems-a ne tũudumã maanego la yεl-wẽnsã zãagre, rẽ n kɩt tɩ Nabiyaam a Mʋhammad, Wẽnd pʋʋsg la A tɩlgr be a yĩng, yeele-: (Ned ning sẽn yara Wẽnd tɩ yaa a Soaba, la lɩslaoongo tɩ yaa a dĩini, la a Mʋhammad tɩ yaa a Tẽn-tʋʋma, a lemba sɩd-kũun noom.)

N-yee! Ninsaal sã n ning a yamẽ wã wakat fãa t'a be a Naandã taoore, la a bãng-A ne A Yʋyã la A Sɩf-rãmbã sẽn be neerã, la a tũ-A tɩ yaa wala yẽ ne-A lame, la a mɑɑn pʋ-peelem a tũudumã pʋga ne Wẽnd A Ye tãa, la a ka bao-A ne a tũudumã zẽng sẽn ka Wẽnd A -Naam yɩ wagelle - a vɩɩmsda vɩɩm sẽn yaa yɩlgemde n yaa zu-noogo dũni kaanẽ, la baas-neere Yaoolem raarã.

Halɩ n tɩ tãag yεl nins sẽn paamd sɩd-kõta dũni pʋgẽ wã, ad a tʋʋlmã gõbgdame ne bãng-n-wãakã maasmã la yarda ne Wẽnd kordgã, A Naam zẽkame, la a pẽg-A A kordgã fãa sẽn yaa noogo la sẽn yaa toogo, la yard sẽn pid ne-a.

La sẽn leb n sõmbẽ tɩ lɩslaam maan noanglem ne-a bʋɩl yĩng t'a zu-noogã na paase la a yĩn-yõgnegã, ya a sẽn na n tẽegd Wẽnd Yʋʋrã wʋsgo A Naam zẽkame, la a sẽn na n karem Alkʋrãan wagellã, wɑlɑ A sẽn yeelã A Naam zẽkame: ﴾Neb nins sẽn kõ sɩdã tɩ b sũyã yõgend ne Wẽnd yʋʋrã tẽegrã, lɑ ɑd yɑɑ ne Wẽnd yʋʋrã tẽegr bɑlɑ la sũyã yõgenda﴿ [ Arɑ'ʿɑdʋ: 28]. La lɩslaam sẽn paas Wẽnd Yʋʋrã tẽegrã la Alkʋrãanã karengã fãɑ, la a pẽnegrã ne Wẽnd sẽn kengde, t'a yõorã yɩlge, t'a sɩd-kũunã kenge. Woto bala, sõmba ne lɩslaam t'a bʋ noanglem ne a dĩinã yεl karengo, a yẽgẽ wã sẽn manegã, sẽn na yɩl t'a tũ Wẽnde, A Naam zẽkame, ne minim, bala Nabiyaamã yeelame, Wẽnd pʋʋsg la A tɩlgr be a yĩnga-: (Bãngr baoob yaa tɩlae n rog lɩslaam fãa), La a leb n yɩ bas-m-meng soab n tũ, n pʋgd Wẽnd saglsã, A Naam zẽkame, Naab ning sẽn naan-a wã, zem t'a bãnga sagellã võore maa a ka bãnge, bala A yeelame, A Naam zẽkame, A Gaf wagellã pʋgẽ: {Lɑ kɑ segd ne sɩd-kõt rɑoog lɑ sɩd-kõɑt poɑk tɩ Wẽnd lɑ A Tẽn-tʋʋmã sã n gãneg yell bʋʋd n sε bɩ b le tɑll yɑm-yãkr b yellã pʋgẽ ye, lɑ ned ning sẽn kɩɩsɑ Wẽnd lɑ A Tẽn-tʋʋmã, rẽnd ɑ menemɑ meneng sẽn yɑɑ vẽenegɑ.} [Al-Ahzaab : 36].

La Wẽnd na pʋʋs la A tɩlg tõnd Nabiyaamã a Mʋhammad la a zakɑ rãmbã la a tũud-n-tɑɑsã (Ṣahaabsã) gilli.

Pidame.

Sebrã buka

Limoro wã

Gom-zugã

Seb-nengã

Leb wɑgdgẽ wã

Kẽng gom-zutã fahras-rãmbẽ wã (pidsdimẽ wã).

Pʋɩ tõnd fo sẽn yã gafã wεεngẽ

Wɑ loog n kɑɑg sɩt elekronikã (zĩigã)

Gafã sẽn leoode n tʋmd ne nugẽ bãngã (Telfõndã)

Tõk n leb n kẽng gom-zugẽ wã